Эрүүл мэндийн байгууллагуудын мэдээ, мэдээлэл хариуцсан мэргэжилтнүүдийг чадавхжуулах сургалт боллоо

Өмнөговь аймгийн Эрүүл мэндийн газар, Эрүүл мэндийн хөгжлийн төвийн Их өгөгдөл судалгааны албатай хамтран “Эрүүл мэндийн байгууллагуудын мэдээ, мэдээлэл хариуцсан мэргэжилтэн, биостатистикч эмч, бүртгэл мэдээллийн ажилтны чадавхийг бэхжүүлэх” сургалтыг амжилттай зохион байгууллаа.

Сургалтыг Эрүүл мэндийн хөгжлийн төвийн Их өгөгдөл судалгааны албаны дарга Г.Дамба “Эрүүл мэндийн статистик мэдээлэл, их өгөгдөл, ирээдүйн чиг хандлага” сэдвээр цахимаар нээж үг хэллээ.

Эрүүл мэндийн хөгжлийн төвийн Их өгөгдөл судалгааны албаны мэргэжилтэн Г.Ган-Эрдэнэ, Ч.Батчингис, Д.Уранчимэг нар Өмнөговь аймагт очиж сургалтыг танхимаар явууллаа.

Тус сургалтад Эрүүл мэндийн газар, Бүсийн оношилгоо эмчилгээний төв, сум, өрхийн эрүүл мэндийн төвүүд болон хувийн хэвшлийн эрүүл мэндийн байгууллагуудын нийт 45 гаруй мэргэжилтэн танхим болон цахимаар хамрагдсан байна.

Сургалтын үеэр оролцогчид:

-Эрүүл мэндийн статистик мэдээ, мэдээллийн чиглэлээр мөрдөгдөж буй хууль, эрх зүйн баримт бичгийг судалж, мөрдлөг болгон хэрэгжүүлэх арга зүйд суралцав.

-Эрүүл мэндийн салбар дахь их өгөгдлийн менежмент, ирээдүйн чиг хандлага, цахимжилтын өнөөгийн байдал, ач холбогдол, ашиглагдаж буй программ хангамжийн талаар мэдлэгээ нэмэгдүүлэв.

-Статистик үзүүлэлт тооцох аргачлал, дүн шинжилгээ хийх арга зүй, тайлан боловсруулах ур чадвараа дээшлүүлэв.

Мөн сургалтын хүрээнд мэдээллийн чанар, найдвартай байдлыг хангах, эрүүл мэндийн мэдээллийн санг бүрдүүлэх, хянах, тайлагнах асуудлаар хэлэлцүүлэг өрнүүлж, цаашдын үйл ажиллагааг сайжруулах чиглэлээр зөвлөмж гаргалаа.