“Монгол хүн амын эрүүл мэндийн эмзэг байдлын шинжилгээ” судалгааны урьдчилсан үр дүнг танилцуулах уулзалт, хэлэлцүүлэг зохион байгууллаа.

Монгол Улсад 2024-2028 онд хэрэгжүүлэх Монгол Улсын Засгийн газар болон Дэлхийн эрүүл мэндийн байгууллагын хамтын ажиллагааны стратегийн баримт бичигт Монгол Улсад дундаж наслалтыг нэмэгдүүлсэн ахиц дэвшлээ тууштай хадгалах, цаашид эрүүл дундаж наслалтыг нэмэгдүүлэх, тэгш бус байдлыг арилгах, эрсдэлт хүчин зүйлсийг шийдвэрлэхэд дэмжлэг үзүүлэхээр тусгагдсан.

Энэхүү үйл ажиллагааны хүрээнд ДЭМБ-ын дэмжлэгтэйгээр “Монгол улсын хүн амын эрүүл мэндийн эмзэг байдлын шинжилгээ” судалгааг хүн амын эрүүл мэндэд нөлөөлж буй нийгэм эдийн засаг, дэд бүтэц, хүрээлэн буй орчин, цаг агаар, уур амьсгалын үзүүлэлтийг эрүүл мэндийн үзүүлэлтүүдтэй холбон харьцуулж, холбогдох байгууллагуудын мэдээлэлд үндэслэн тодорхойлон гаргасан байна.

“Монгол улсын хүн амын эрүүл мэндийн эмзэг байдлын шинжилгээ” судалгааны үр дүнг судлаач, Анагаах ухааны доктор Б.Батзориг урьдчилсан байдлаар танилцууллаа.

Судалгааны үр дүнгийн хэлэлцүүлэгт Дэлхийн эрүүл мэндийн байгууллага,  Эрүүл мэндийн яам, Үндэсний статистикийн хороо, Эрүүл мэндийн хөгжлийн төв, Цаг уур, орчны шинжилгээний газар, Ус цаг уур, орчны судалгаа, мэдээллийн хүрээлэн, Хот, суурины ус хангамж, ариутгах татуургын ашиглалт, үйлчилгээ зохицуулах хороо, Эрүүл мэндийн байгууллагуудын нийт 80 гаруй албан тушаалтан, судлаач, эмч, мэргэжилтнүүд оролцож, санал бодлоо солилцсон үр дүнтэй хэлэлцүүлэг боллоо.