2026-2029 ОНД МЭРГЭШЛИЙН ЗЭРГИЙН ШАЛГАЛТ ЗОХИОН БАЙГУУЛАХ ЭРХ ШИНЭЭР ХҮСЭХ МЭРГЭЖЛИЙН НИЙГЭМЛЭГ, ХОЛБООДЫГ СОНГОН ШАЛГАРУУЛАЛТЫН ЗАР

Ажлын алба нь Эрүүл мэндийн сайдын “Журам шинэчлэн батлах тухай” 2019 оны А/513 дугаар тушаалын нэгдүгээр хавсралтаар батлагдсан “Мэргэшлийн зэрэг олгох, нөхөн олгох, хүчингүй болгох журам”-ын 3.2.3, 3.2.4, 3.3.1, 3.3.9 дэх заалт, Эрүүл мэндийн яамны дэргэдэх Эмнэлгийн мэргэжилтний хөгжлийн зөвлөлийн хурлын 2020 оны 04 дүгээр сарын 03-ны өдрийн 06 дугаар тогтоолоор баталсан мэргэжил, үндсэн ба төрөлжсөн мэргэшлийн чиглэлийн дагуу мэргэшлийн зэрэг олгох үйл ажиллагааг 3 жилийн хугацаатай зохион байгуулах мэргэжлийн нийгэмлэг, холбооны сонгон шалгаруулалтын бэлтгэл ажлыг ханган ажиллаж байна.

Иймд Эмнэлгийн мэргэжилтний хөгжлийн зөвлөлийн баталсан мэргэжил, мэргэшлийн дагуу дээрх журмын 5 дах хэсэгт заасан “Мэргэшлийн зэргийн шалгалт зохион байгуулах мэргэжлийн нийгэмлэг, холбоонд тавигдах шаардлага”-ыг хангасан, 2026-2029 онд эмнэлгийн мэргэжилтэнд мэргэшлийн зэрэг олгох үйл ажиллагааг зохион байгуулах эрх шинээр хүсэх мэргэжлийн нийгэмлэг, холбоод материалаа бүрдүүлэн 2026 оны 01 дүгээр сарын 10-ны өдрийн 17:30 цагийн дотор ажлын албанд албан бичгээр ирүүлнэ үү.

Хаяг: Улаанбаатар хот, Сүхбаатар дүүрэг, 1-р хороо, Энхтайвны гудамж 13 Б, 210648, шуудангийн хайрцаг 187, Утас: 70110893

Тавигдах шаардлага:

Мэргэшлийн зэрэг олгох үйл ажиллагааг зохион байгуулах мэргэжлийн нийгэмлэг, холбоо нь дараах шаардлагыг хангасан байна. Үүнд:

• Улсын бүртгэлийн гэрчилгээ, албан ёсны нэр, тэмдэг, хэвлэмэл хуудастай байх;
• Сүүлийн 3-аас доошгүй жил үйл ажиллагаа тасралтгүй явуулсан байх (татварын тайлангаар баталгаажуулж татвар, нийгмийн даатгал болон санхүүгийн тайлан балансын өр авлагагvйг нотолно);
• Байнгын орон тоо бүхий ажлын албатай байх;
• Тухайн мэргэжил, мэргэшлээр ажилладаг нийт эмнэлгийн мэргэжилтний 51-ээс доошгүй хувийг гишүүнчлэлдээ багтаасан байх;
• Гишүүнчлэлтэй эмнэлгийн мэргэжилтний дэлгэрэнгүй бүртгэл мэдээлэлтэй байх;
• Тухайн мэргэжил, мэргэшлийн чиглэлээр мэргэжил дээшлүүлэх, багц цагийн богино хугацааны сургалт эрхлэх зөвшөөрөлтэй байх, батлагдсан сургалтын хөтөлбөр, төлөвлөгөөтэй байх;
• Гишүүнчлэлтэй эмнэлгийн мэргэжилтний үр чадварыг тасралтгүй сайжруулах 3-5 жилийн төлөвлөгөөтэй байх;
• Гишүүнчлэлтэй эмнэлгийн мэргэжилтний 60-аас доошгүй хувийг тухайн мэргэжлийн чиглэлийн багц цагийн богино хугацааны сургалтад, 30-аас доошгүй хувийг тухайн мэргэжил, мэргэшлийн чиглэлээр мэргэжил дээшлүүлэх сургалтад жил тутам хамруулдаг байх;
• Гишүүнчлэлтэй эмнэлгийн мэргэжилтний харьяалах эрүүл мэндийн байгууллагатай хамтран ажилладаг байх;
• Холбогдох олон улсын мэргэжлийн нийгэмлэгийн гишүүн буюу тогтмол хамтран ажилладаг байх, үүнийг гэрээ, албан тайлангаар баталгаажуулсан байх;

Бүрдүүлэх материалын жагсаалт

1. Мэргэшлийн зэрэг олгох үйл ажиллагааг зохион байгуулах эрх хүссэн албан бичиг;

2. Эрүүл мэндийн сайдын "Журам шинэчлэн батлах тухай" 2019 оны А/513 дугаар тушаалын 1-р хавсралтаар батлагдсан "Мэргэшлийн зэрэг олгох, нөхөн олгох, хүчингүй болгох журам"-ын 5 дах хэсэгт заасан шаардлагыг хангасан талаарх баримт, бичиг;

3. Мэргэшлийн зэрэг горилогчид тавигдах тусгай шаардлагыг баталсан төсөл /зарын хуудас, тэмдэглэлээр баталгаажуулсан байх/;

4. Журмын 8.2-д заасны дагуу мэргэшлийн зэргийн Ахлах, Тэргүүлэх шатлалын шалгалтыг зохион байгуулах хэлбэр болох сорил, бодлого, гардан үйлдэл, ярилцлага, тайлан хамгаалалт зэргээс сонгон 3 жилийн хугацаанд шалгалт зохион байгуулах хэлбэрийн санал;

5. Зөвлөх зэргийн шалгалтын зохион байгуулалтад тусгах санал;

Жич:

Дэлгэрэнгүй мэдээллийг ажлын албаны http://www.hdc.gov.mn/ цахим хаяг болон 70110893 дугаарын утсаар авна уу.

Гарын үсэг, тэмдэгээр баталгаажуулсан тусгай шаардлагыг нотлох шаардлагатай материалыг хавсаргана уу.

Хүний нөөцийн хөгжлийн алба 2025 он