Мэдээ:
  • Төрөлт: Улсын хэмжээнд 2019 оны жилийн эцсийн байдлаар 77 601 эх төрсөн нь өнгөрсөн оны мөн үеэс 543 төрөлтөөр буюу 0.7 хувиар өссөн байна. Амьд төрсөн хүүхэд: 2019 оны жилийн эцсийн байдлаар улсын хэмжээнд 78 223 хүүхэд амьд төрсөн нь өнгөрсөн оны мөн үеэс 695 хүүхдээр буюу 0.9 хувиар өсчээ. Төрөлтийн түвшин 1000 хүн амд 24.8 байна. Эхийн эндэгдэл: Улсын хэмжээнд 2019 оны жилийн эцсийн байдлаар эхийн эндэгдлийн 18 тохиолдол бүртгэгдэж, 100 000 амьд төрөлтөд 23.0 байна. Өнгөрсөн оны мөн үеэс 3 төрөлтөөр буюу 100 000 амьд төрөлтөд 4.1-оор буурсан байна. Нялхсын эндэгдэл: Улсын хэмжээнд 2019 оны жилийн эцсийн байдлаар нялхсын эндэгдлийн 1040 тохиолдол бүртгэгдэж, 1000 амьд төрөлтөд 13.3 ногдож байна. Өнгөрсөн оны мөн үетэй харьцуулахад 3 тохиолдлоор нэмэгдсэн хэдий ч 1000 амьд төрөлтөд 0.1-оор буурсан үзүүлэлттэй байна. Тав хүртэлх насны хүүхдийн эндэгдэл: Улсын хэмжээнд 2019 оны жилийн эцсийн байдлаар тав хүртэлх насны хүүхдийн эндэгдлийн 1262 тохиолдол бүртгэгдэж, 1000 амьд төрөлтөд 16.1 ногдож байгаа нь өмнөх оны мөн үетэй харьцуулахад 48 тохиолдлоор буюу 1000 амьд төрөлтөд 0.8-оор буурсан байна. Нас баралт: 2019 оны жилийн эцсийн байдлаар улсын хэмжээнд нас баралтын 17 123 тохиолдол бүртгэгдсэн нь өнгөрсөн оны мөн үеэс 208 тохиолдлоор буурсан байна. Нийт нас баралтын 10 471 тохиолдол буюу 61.2 хувь нь эрэгтэй, 6652 буюу 38.8 хувь нь эмэгтэй байна. Халдварт өвчин: Улсын хэмжээнд 2019 оны жилийн эцсийн байдлаар 28 төрлийн 45 232 халдварт өвчний тохиолдол бүртгэгдэж, 10 000 хүн амд 139.7 ногдож байна. Өмнөх оны мөн үеэс 3158 тохиолдлоор буюу 10 000 хүн амд ногдох өвчлөл 7.3-оор нэмэгдсэн байна.
ЗАСГИЙН ГАЗРЫН ХЭРЭГЖҮҮЛЭГЧ АГЕНТЛАГ ЭРҮҮЛ МЭНДИЙН ГАЗРЫН ДЭД ДАРГА Ц.ХУНГИЙН ХЭВЛЭЛИЙН БАГА ХУРАЛ

ЗАСГИЙН ГАЗРЫН ХЭРЭГЖҮҮЛЭГЧ АГЕНТЛАГ ЭРҮҮЛ МЭНДИЙН ГАЗРЫН ДЭД ДАРГА Ц.ХУНГИЙН ХЭВЛЭЛИЙН БАГА ХУРАЛД ЗҮРХ СУДАС, ЧИХРИЙН ШИЖИН ӨВЧНИЙ ӨНӨӨГИЙН БАЙДАЛ, ЦААШДЫН ХАМТЫН АЖИЛЛАГААНЫ ТАЛААР ХИЙСЭН МЭДЭЭЛЭЛ

Халдварт бус өвчин гэж амьдралын хэв маяг, зан үйлийн буруу дадал, хэвшлээс үүдэлтэй өвчин эмгэгийг хэлдэг. Монгол улсад сүүлийн жилүүдэд нийгэм, соёл, ахуй амьдралын хэв маяг, зан үйлээс хамааран зүрх судас, чихрийн шижин өвчнөөр өвчлөгсдийн тоо нэмэгдэж байна. Тухайлбал: 2010 оны эрүүл мэндийн үзүүлэлтээр амбулаторт бүртгэгдсэн өвчлөл  10 000 хүн амд зүрх судасны тогтолцооны өвчин -708.5 (үүнээс цусны даралт ихсэх өвчний тархалт- 300.3, зүрхний ишеми өвчний тархалт-177), хорт хавдар-121.9 (үүнээс элэгний хорт хавдарын тархалт- 13.7 ,  умай хүзүүний хорт хавдарын тархалт- 14.6, хөхний хорт хавдарын тархалт-8.2), чихрийн шижин өвчин- 29.4 байна. Түүнчлэн хүн амын нас баралтын эхний 5 шалтгаанд 10 000 хүн амд зүрх судасны өвчин -(23.61), хавдар –(13.02), өвчлөл ба нас баралтын гадны шалтгаан (10.11),  хоол боловсруулах тогтолцооны өвчин- (5.30),  амьсгалын тогтолцооны өвчин- (2.72)  орж байна. Тамхи татах, архи уух, артерийн даралт өндөр байх, цусан дах глюкоз ихсэх, таргалалт, хөдөлгөөний хомсдол, буруу хооллолт зэрэг эрсдлүүд нь зүрх судасны эмгэг, тархины цус харвалт, чихрийн шижин өвчинд хүргэдэг. 2009 онд хийгдсэн “Халдварт бус өвчин осол гэмтлийн шалтгаан эрсдэлт хүчин зүйлсийн тархалтын судалгаа”-гаар хүн амын 27.6 %  тамхи татдаг, нийт хүн амын 38.6% сүүлийн 1 сард архи, согтууруулах ундаа хэрэглэдгийг тогтоосон. Мөн тус судалгаагаар 15–64 насны хүн амын гуравны нэгээс дээш хувь нь илүүдэл жинтэй буюу таргалалттай,  нийт хүн амын 7.5 хувь хөдөлгөөний хомсдолтой байгааг тогтоожээ. Эдгээр халдварт бус өвчнийг үүсгэдэг хүчин зүйлс хэдий чинээ олон байна зүрх судасны өвчин, чихрийн шижингээр өвдөх магадлал төдий чинээ өндөр байдаг.  Хэрвээ та эрүүл хооллож, дасгал хөдөлгөөнөөр тогтмол хичээллэж, биеийн жингээ хэвийн хэмжээнд барьснаар зүрх судасны эмгэгийг 80 хувь, 2-р  хэв шинжийн чихрийн шижинг 90 хувь, хорт хавдрын өвчлөлийг 30 хувиар бууруулах боломжтой юм.

Цаашдын хэрэгжүүлэх үйл ажиллагаа:

 Зүрх судасны болон чихрийн шижин өвчнөөс урьдчилан сэргийлэхтэй холбоотой мэдээлэл сургалт сурталчилгааны ажлыг олон нийтийн оролцоог ханган үндэсний хэмжээнд зохион байгуулах шаардлагатай юм. Үүнд:

  • Орон нутгийн өөрсдийн онцлог, эрэлт хэрэгцээ дээр үндэслэн мэдээлэл, сургалт сурталчилгааны ажлыг зохион байгуулах;
  • Шийдвэр гаргагч нарт зориулан зүрх судас, чихрийн шижин  өвчнний эрсдэлт зүйл болох архи, тамхины хэрэглээг бууруулах, урьдчилан сэргийлэх арга хэмжээг бодлого, төлөвлөгөөндөө тусган хэрэгжүүлэх талаар ухуулга нөлөөллийн арга хэмжээг зохион байгуулах;
  • Хүн амын дунд тамхи, архины хор хөнөөл,  идэвхтэй хөдөлгөөний ач холбогдол, хийжүүлсэн ундаа, өөх тос, давсны агууламж ихтэй хүнсний бүтээгдэхүүний хэрэглээг хязгаарлах, бууруулах талаар мэдээлэл сургалт, сурталчилгааг зохион байгуулах;
  • Хүн амд артерийн даралт, чихрийн шижин өвчнөөс урьдчилан сэргийлэх үзлэгт хамрагдахын ач холбогдлын талаар сурталчлах;
  • Эмнэлгийн эмч, ажилтнуудад артерийн даралт, чихрийн шижин өвчний эмнэл зүйн удирдамжийг хэрэгжүүлэхэд мэргэжил арга зүйгээр хангах;