Мэдээ:
  • Төрөлт: Улсын хэмжээнд 2019 оны 1 сарын байдлаар 5956 эх төрсөн нь өнгөрсөн оны мөн үеэс 277 төрөлтөөр буюу 4.4 хувиар буурсан байна. Амьд төрсөн хүүхэд: 2019 оны 1 сарын байдлаар улсын хэмжээнд 6001 хүүхэд амьд төрсөн нь өнгөрсөн оны мөн үеэс 270 хүүхдээр буюу 4.3 хувиар буурчээ. Амьд төрсөн хүүхдийн 3063 буюу 51.0 хувь нь хүү, 2938 буюу 49.0 хувь нь охин байна. Эхийн эндэгдэл: Улсын хэмжээнд 2019 оны 1 сарын байдлаар эхийн эндэгдлийн 3 тохиолдол бүртгэгдэж, 100 000 амьд төрөлтөд 50.0 байгаа нь өнгөрсөн оны мөн үеэс 2 тохиолдлоор буюу 100 000 амьд төрөлтөд 34.1-оор өссөн байна. Нялхсын эндэгдэл: Улсын хэмжээнд нялхсын эндэгдлийн 112 тохиолдол бүртгэгдэж, 1000 амьд төрөлтөд 18.7 ногдож байгаа нь өнгөрсөн оны мөн үетэй харьцуулахад 16 тохиолдлоор буюу 1000 амьд төрөлтөд 3.4-оор өссөн үзүүлэлттэй байна.Тав хүртэлх насны хүүхдийн эндэгдэл: Улсын хэмжээнд 2019 оны 1 сарын байдлаар тав хүртэлх насны хүүхдийн эндэгдлийн 139 тохиолдол бүртгэгдэж, 1000 амьд төрөлтөд 23.2 ногдож байгаа нь өмнөх оны мөн үетэй харьцуулахад 26 тохиолдлоор нэмэгдсэн байна. Нас баралт: 2019 оны 1 сарын байдлаар нас баралтын 1573 тохиолдол бүртгэгдсэн нь өнгөрсөн оны мөн үеэс 87 тохиолдлоор өссөн байна. Нийт нас баралтын 917 тохиолдол буюу 58.3 хувь нь эрэгтэй, 656 буюу 41.7 хувь нь эмэгтэй байна. Халдварт өвчин: Улсын хэмжээнд 18 төрлийн 3671 халдварт өвчний тохиолдол бүртгэгдэж, 10 000 хүн амд 11.6 ногдож байна. Өмнөх оны мөн үеэс 333 тохиолдлоор буюу 10 000 хүн амд ногдох өвчлөл 0.9-оор нэмэгдсэн байна.

Мэдээ, мэдээлэл

Эрүүл мэндийн хөгжлийн төвийн Төгсөлтийн дараах сургалтын алба 2013 оны 11 сарын 01-ны өдөр эмнэлгийн мэргэжилтний төгсөлтийн дараах сургалтын үйл ажиллагааг сайжруулах зорилгоор сургалт эрхлэгч байгууллагуудын сургалт эрхэлсэн албан тушаалтан, сургалтын арга зүйч нар оролцсон зөвлөлдөх уулзалтыг зохион байгууллаа.

Уулзалтын үеэр:  

-“Сургалт эрхлэгч байгууллагуудын сургалтын явц, сургалтын орчинд хийсэн үнэлгээ”-ний талаар болон байгууллага бүрт хийсэн үнэлгээ зөвлөмжийг ЭМХТ-ийн төгсөлтийн дараах сургалтын албаны мэргэжилтэн Ц.Амаржаргал танилцууллаа.

- Сургалт эрхлэгч байгууллагуудаас Улсын нэгдүгээр төв эмнэлгийн сургалт, судалгааны албаны дарга Б.Болормаа өөрийн байгууллагад хийсэн шинэлэг ололттой ажлын талаар танилцуулж, туршлага солилцсон.

- Сургалтын төлөвлөлт, санхүүжилт, зарцуулалт, хяналтын талаар ЭМХТ-ийн ерөнхий нягтлан бодогч Б.Очир мэдээлэл хийж асуултанд хариулан зөвөлгөө өгсөн.

- ЭМХТ-ийн төгсөлтийн дараах сургалтын албаны дарга С.Өлзийсайхан сургалт эрхлэгч байгууллагуудад үйл ажиллагаандаа анхаарч ажиллах нэгдсэн зөвлөмжийг танилцуулж тайлбар өгсөн.

- ЭМХТ-ийн захирал Ч.Бат-Эрдэнэ 2013 онд сургалт эрхлэх нэмэлт эрх авсан байгууллагуудад эрхийн гэрчилгээг гардуулж ажлын амжилт хүслээ.

- Сургалт эрхлэгч байгууллагуудын сургалт эрхэлсэн албан тушаалтан, сургалтын арга зүйч нар харилцан санал солилцон туршлага судалсан. 

Энэхүү уулзалт нь сургалт эрхлэгч байгууллагуудад хийгдсэн үнэлгээнд үндэслэн  байгууллага бүрт болон нэгдсэн байдлаар боловсруулж гаргасан зөвлөмжийг цаашдын үйл ажиллагаандаа хэрэгжүүлэн төгсөлтийн дараах сургалтын чанарыг сайжруулахад ихээхэн  үр дүнтэй   болж өндөрлөлөө.

Сүүлийн үед эрүүл мэндийн салбарын үйл ажиллагааны доголдол, дутагдал, эмч, эмнэлгийн мэргэжилтний буруутай үйлдлийн талаар хэвлэл, мэдээллийн хэрэгслээр түлхүү гарч байгаа боловч эрүүл мэндийн тусламж үйлчилгээнд олон сайхан ололт амжилт гаргаж буй байгууллага, эмч, эмнэлгийн мэргэжилтэний талаар дурсахгүй өнгөрч байгаа нь харамсалтай.

Тэгвэл өнөөдөр чихэнд чимэгтэй хэд хэдэн сайхан мэдээг эрүүл мэндийн байгууллагаар үйлчлүүлэгч иргэдэд дуулгахад таатай байна.

Өөрийн эзэмшсэн мэргэжлийнхээ нэр хүндийг гутааж, ажил албандаа хайнга ханддаг ухамсар дорой нэгэн байхад олон улсын стандартад нийцсэн техник тоног төхөөрөмжийг ашигласан, дэлхийн түвшинд хүрсэн оношлогоо эмчилгээний шинэ арга барил нэвтрүүлсэн, яаралтай түргэн тусламжийг оновчтой зөв үзүүлж олон хүний амь насыг аварсан тохиолдууд Эрүүл мэндийн хөгжлийн төвийн “Эрүүл мэндийн байгууллагуудын алдаа зөрчил, ололт амжилтыг бүртгэх мэдээний сан”-д бүртгэгдсээр байна.  Эдгээрээс дурьдвал:

Шастины нэрэмжит Улсын III Төв Эмнэлгийн Зүрхний мэс заслын тасагт “Операция протезирование в условиях АИК”-ийг аргыг нэвтрүүлж цусны зохиомол эргэлтийн нөхцөлд гол судасны хавхлагт хиймэл хавхлага суулгах, хөлийн өнгөц венийн судас ашиглан зүрхний баруун титэм артерийг гол судастай залгах хагалгааг амжилттай хийсэн байна.

Хавдар Судлалын Үндэсний Төв нь 2012 оноос эхлэн элгийг дурангийн мэс заслын аргаар тайрах хагалгааг Монгол улсад нэвтрүүлэн одоог хүртэл амжилттай гүйцэтгэж байгаа төдийгүй эмнэлгийн тусламж үйлчилгээ өндөр хөгжсөн улс орнуудад хэрэглэгддэг цөсний замын цоорхойг илрүүлэх “White Test” аргыг шинээр нэвтрүүлээд байна.

Наркологийн Төв нь ОХУ болон ХБНГУ, АНУ-д хийгддэг сэтгэцийн процесс, сэтгэцийн чанарын онцлог, өөрчлөлтийг илрүүлэх сорилыг шинжин хийх  аргыг оношилгоонд шинээр нэвтрүүлснээр ой санамж, анхаарал, сэтгэхүй, оюуны ажиллах чадвар зэрэг сэтгэцийн процессийг мөн өөрийн ухамсар, биеэ цэгнэх чанар, зориг эрмэлзлэл, неврозийн илрэл, үгийн илрэл, темперамент, сэтгэлийн хөдөлгөөний байдал, аминч шинж, бие хүний сэтгэцийн чанарын онцлог өөрчлөлтүүдийг хэмжих болсон байна.

Тус эмнэлгийн хувьд архинд донтох эмгэгтэй хүний бие хүний сэтгэцийн чанарын онцлог, өөрчлөлтийн илрэлийг сэтгэцийн илрэлийн сорилын тусламжтайгаар оношилдог болсон нь эмчилгээг оновчтой сонгох, өвчний явцыг тодорхойлох, эрт илрүүлэх, хяналтын явцыг тодотгох өндөр ач холбогдолтой болсон байна.

Говь-Алтай аймгийн Нэгдсэн эмнэлэгт “Үтрээгээр умайг бүхэлд нь тайрч авах” мэс заслыг нэвтрүүлэн одоогоор 4 эмэгтэйд уг хагалгааг хүндрэлгүй амжилттай хийсэн байна. Мөн түүнчилэн чөмөгт ясны хугарлыг битүү аргаар түгжээт хадаасаар хадаж, бэхлэх мэс заслыг анх удаа орон нутагт 8 хүнд амжилттай хийсэн нь орон нутгийн эмч, эмнэлгийн мэргэжилтнүүдийн ур чадварын илэрхийлэл болж байна.

Хэнтий аймгийн Нэгдсэн эмнэлэгт ходоодны нугалуур хэсгийн том хэмжээтэй шарх цоорсон байсныг ходоодны 3/2 хэсгийг тайрч нарийн гэдэстэй залгах мэс заслыг орон нутгийн нөхцөлд амжиллтай хийсэн байна.

Төв аймгийн Нэгдсэн эмнэлэгт 2012 оноос эхлэн тархины цус харвалт, зүрхний шигдээсийг эрт илрүүлэх, оношлох, эмчлэх, нөхөн сэргээх, дахин харвалтаас урьдчилан сэргийлэх цогц тусламж үйлчилгээг сайжруулах, нарийн мэргэжлийн тусламж үйлчилгээг газар дээр нь үзүүлэх, зүрх судасны цочмог эмгэгээс шалтгаалсан хөдөлмөрийн чадвар алдалт, нас баралтыг бууруулах зорилт бүхий “Инфаркт, Инсульт”-ын багийг орон нутгийн нөхцөл байдалд тохируулан өөрсдийн хүч, бололцоонд тулгуурлан зохион байгуулж, ажиллаж байна.

Эрүүл мэндийн салбарын хөгжил, дэвшил, шинэчлэлд өөрсдийн хувь нэмрийг оруулан дэвшилтэт технологийг нэвтрүүлж, мэдлэг чадвараа дайчлан зүрх сэтгэлээ зориулан ажиллаж байгаа эмч, эмнэлгийн мэргэжилтэнгүүддээ ажлын өндөр амжилт хүсье.

 

 

 

Эрүүл мэндийн яамнаас төрийн сангийн санхүүжилтээр гадаадын өндөр хөгжилтэй оронд ЭМЯ-ны харьяа төв эмнэлэг, төрөлжсөн мэргэжлийн төв, БОЭТ, аймаг дүүргийн нэгдсэн эмнэлгийн эмч нарыг анх удаа урт, богино хугацааны мэргэжил дээшлүүлэх сургалтад хамруулж эхэлсэн. 

Япон, БНХАУ, БНСУ, Турк, ОХУ зэрэг улсад урт болон богино хугацаагаар 114 эмч, сувилагчийг сургахаар төлөвлөсөн байна. 

Эрүүл мэндийн сайд Н.Удвал, ЭМЯ-ны Төрийн захиргааны удирдлагын газрын дарга Д.Оюунчимэг, Эрүүл мэндийн хөгжлийн төвийн захирал Ч.Бат-Эрдэнэ нар өнөөдөр гадаадад суралцах эмч, сувилагчдын дөрөв дэх багийнхантай уулзлаа. Нийт 19 хүний бүрэлдэхүүнтэй энэ багийнхан ОХУ-ын Эрхүү хотын Анагаах ухааны их сургуульд мэргэжил дээшлүүлэхээр явж байгаа юм. Мэс засал, хүүхэд, дотор, эх барих, эмэгтэйчүүд, мэдээгүйжүүлэг эрчимт эмчилгээний чиглэлийн 16 эмч, гурван сувилагч нэг сарын хугацаатайгаар ийнхүү эх орноосоо мордож байна.  

Гадаадын улс орнуудад суралцах эмч, сувилагч нарт мэргэжил дээшлүүлэх хугацаандаа ямар зүйлийг голлон анхаарах талаар нэгдсэн удирдамжийг өгч байгаа юм байна. Тодруулбал, Эмч нар тухайн мэргэжлийнхээ эмнэлгийн тусламж үйлчилгээний зохион байгуулалт, стандарт, технологи, сургалт, шинэ дэвшилтэт арга барилаас суралцаж, мэдлэг ур чадвараа дээшлүүлэхийг зэрэгцээ эх орондоо нэвтрүүлэхийг үүрэг болгож байгаа ажээ.Эрүүл мэндийн сайд Н.Удвал хэлэхдээ, “Бид энэ жил эмч, мэргэжилтнүүдийнхээ мэргэжлийг дээшлүүлэх асуудалд голлон анхаарч ажиллаж байна. Ялангуяа аймаг, дүүргийн нэгдсэн эмнэлгийн эмч нарыг илүүтэйгээр сургахаар төлөвлөсөн. Мөн манай оронд дутагдалтай байдаг нарийн мэргэжлүүд тухайлбал, Андрологи, Иммуногематологи, тархи, нуруу нугасны мэс заслын чиглэлээр эмч нарын мэргэжлийг дээшлүүлэхээр суралцуулж байгаа. Манай улс эх, нярайн эндэгдэл өндөр орноос дунд түвшинтэй орны тоонд орсон. Энэ бол эрүүл мэндийн салбарын амжилт. Цаашид улам бууруулахад та бүгдийн гадны өндөр хөгжилтэй орноос сурч ирсэн шинэ технологи, аргачлал чухал үүрэг гүйцэтгэнэ гэдгийг хэлэхийг хүсч байна” хэмээгээд яаралтай түргэн тусламжийн чиглэлээр БНСУ-д ч эмч нарыг сургаж эхэлснийг дуулгасан.

Томуу, томуу төст өвчин нь  /ханиад, томуу нь/ вирусээр  үүсгэгддэг амьсгалын цочмог  халдварт өвчин юм. Халуурах, толгой өвдөх, ханиалгах, хамраас  нус  гоожих, үе мөч, булчингаар  өвдөх  буюу   ерөнхий  хордлогын шинжээр  илэрнэ.

 

Томуу, томуу төст өвчнөөс  хэрхэн  сэргийлэх вэ?

    Биеийн эсэргүүцэл сайн байх нь таныг болон  үр хүүхдийг тань ханиад томуунаас хамгаална. Иймээс та дараах энгийн зөвлөмжийг мөрдөөрэй.

  • Амин дэмтэй чанарлаг  хоол идээрэй. Халуун аарц, сармистай  хар шөл, аньс  чацарганы  шүүс,  цагаан гааг  буцалган уугаарай. 
  •  Биеийн тамирын  дасгал, хөдөлгөөнийг  эрхэмлэн,  ажил амралтаа зохицуулж, хангалттай амрах хэрэгтэй.
  • Улирлын  байдалд  тохируулан хувцаслаарай. Хүүхдүүдээ  хүйтэнд малгай, ороолт, бээлий хэрэглүүлж заншаарай.
  • Томуу, томуу төст өвчнөөс  сэргийлэх  цэгчилсэн  иллэг  хийх
  • Царван, содын уусмалаар  хоолой зайлах
  • Гэр, сургууль, цэцэрлэг, ажлын байрандаа  цэвэр агаар  оруулж, өдөрт чийгтэй цэвэрлэгээг  2-оос доошгүй  удаа хийх   зэрэг   энгийн  аргуудыг  хэрэглээрэй


Томуу, томуу төст өвчний  шинж  тэмдэг илэрвэл яах вэ?

    Өрхийн болон хяналтийн эмчдээ  үзүүлж  эмчийн зөвлөгөөг  баримтлаарай
    Та  ханиад томууны   үед   эмийг эмчийн   зааврын  дагуу  хэрэглээрэй                                                   

 Дур мэдэн  антибиотик   хэрэглэхээс  зайлсхийгээрэй   

 

Томуу томуу төст өвчнөөс та өөрийгөө болон үр хүүхдээ хамгаалж  чадна.